बैतडी- नेपाल कम्युनिष्ट पार्टी नेकपा एमाले बैतडीले यहि मंसिर १८ गते बैठक डाँकेको छ । पुष्पलाल मध्यपहाडी लोकमार्ग संकल्प यात्रा–२०८० को समिक्षाका लागि जिल्ला कमिटिको बैठक डाँकीएको नेकपा एमाले जिल्ला कमिटि उपसचिव लोकेन्द्र भण्डारीले जानकारी दिए ।
बैठकमा जिल्ला भित्र रहेका केन्द्रिय सदस्य , प्रदेश कमिटी सदस्य, जिल्ला पदाधिकारी एवं सदस्य, पालिका कमिटीका अध्यक्षहरुलाई बोलाइएको उनले बताए । पुष्पलाल मध्यपहाडी लोकमार्ग संकल्प यात्राको समिक्षाका लागि बैठक डाँकीएको र बैठकमा जिल्ला अधिवशेन र पालिका अधिवेशन लगायतका अन्य विषयमा समेत छलफल हुने उपसचिव भण्डारीले बताए ।
एमालेले झुलाघाट–चिवाभञ्ज्याङ समृद्धिका लागि संकल्प यात्रा सुरु गरेको छ । बिहीवार बैतडीबाट एमालले झुलाघाट–चिवाभञ्ज्याङ समृद्धिका लागि संकल्प यात्रा सुरु गरेको हो । झुलाघाट–चिवाभञ्ज्याङ समृद्धिका लागि संकल्प यात्राको आरम्भ पछि बैतडीको गोठलापानीमा आयोजित आमसभामा विभिन्न पार्टी परित्याग गरि दर्जनौ नेता कार्यकर्ता एमालेमा प्रवेश गरेका एमालेको दाबी छ ।
नेकपा एकीकृत समाजवादी केन्द्रीय सदस्य एवं दार्चुला इञ्चार्ज नरेन्द्र बिष्ट एकीकृत समाजवादीका बैतडी जिल्ला अध्यक्ष महादेव भट्ट पनि एमालेमा फर्किएका छन् । यस्तै एकीकृत समाजवादीका प्रदेश कमिटि सदस्य पार्वती भट्ट र चमनकुमार भण्डारी लगायतका एकीकृत समाजवादी बैतडीका अधिकांश नेता कार्यकर्ता एमालेमा फर्किएका हुन् ।
यस्तै २०७४ सालको स्थानीय तहको निर्वाचनमा नेपाली कांग्रेसबाट पाटन नगरपालिकाको उपप्रमुखमा निर्वाचित सरस्वती कोली र उनका पति नेपाल दलित संघको अध्यक्ष रही सकेका रमेश कोली पनि एमालेमा प्रवेश गरेका छन् । विभिन्न राजनितिक दल र एमाले छाडे गएका दर्जनौ नेता कार्यकर्ता फर्किएकाले बैतडीमा एमाले अझ बलियो बन्दै गएको एमाले बैतडीका नेताहरुको भनाई छ ।
एमाले जिल्ला कमिटिको बैठक १८ गते बिहान ११ बजे पार्टी कार्यालय गढी स्थित सभाहलमा बस्ने बताइएको छ ।
