बैतडी –नेपाली कांग्रेस बैतडीले दशरथचन्द नगरपालिका वडा नं १ मा पार्टीभित्र देखिएको विवाद सुल्झाउन समिति गठन गरेको छ । जिल्ला कार्य सम्पादन समितिको बैठकले जिल्ला कार्यसमिति सदस्य रनबहादुर बोहरा संयोजक रहने गरेर तीन सदस्यीय समिति गठन गरेको हो ।
समितिमा प्रदेश सभा क्षेत्र नं. (ख)का सचिव धनबहादुर क्षेत्री र दशरथचन्द नगरपालिकाका उपसभापति हरिराम टमाटालाई सदस्य राखिएको छ ।
वडामा पार्टीभित्र क्रियाशील सदस्यता लगायतका बिषयमा विवाद रहेको र जिल्ला कार्यसमितिमा समेत उजुरी परेकाले विवाद समाधानका लागि समिति गठन गरिएको नेपाली कांग्रेस बैतडीका सचिव देवराज जोशीले बताए ।
समितिलाई विवाद समाधान गरी पौष १५ गतेभित्र जिल्ला कार्यसमितिमा प्रतिवेदन पेश गर्न भनिएको छ । सकेसम्म अधिकतम सहमतिको प्रयास गर्न र नभए बहुमतको आधारमा समस्या समाधान गर्न समितिलाई कार्यादेश दिइएको छ ।
वडा नं १ मा पार्टीभित्र देखिएको समस्या समाधानका लागि समितिले सबै पक्षसंग छलफल गर्ने र समस्याको समाधान निकाल्ने समिति सदस्य धनबहादुर क्षेत्रीले बताए ।
दशरथचन्द नगरपालिका वडा नं १ मा पार्टीभित्र देखिएको विवादकै कारण गएको स्थानीय तह निर्वाचनमा वडामा पार्टीले हार व्यहोरेको निष्कर्ष समेत निकालिएको छ । व्यापक अन्तरघात र विवादका कारण पार्टीमा क्षति पुगेको समिति सदस्य क्षेत्रीले बताए ।
