बैतडी- सत्ता गठबन्धनले प्रतिनिधि सभातर्फको १ सय ६० सिटमा सहमति जुटाएको छ । सो सहमति अनुसार बैतडी नेकपा माओवादी केन्द्रको भागमा परेको छ ।
माओवादीको भागमा बैतडी परेसंगै नरेन्द्र कुवँर (विजयसुन्दर)ले टिकट पाउने निश्चित जस्तै भएको छ । संघीय सांसदका लागि माओवादी केन्द्रका पोलिट्ब्युरो सदस्य एवं बैतडी इन्चार्ज नरेन्द्रबहादुर कुँवर (विजयसुन्दर)को नाम पार्टीले यसअघिनै सर्वसम्मत सिफारिश गरेको थियो ।
कुँवर २०६४ सालको निर्वाचनमा संविधान सभा सदस्यमा निर्वाचित भएका थिए । बैतडी माओवादीको भागमा परेपनि काँग्रेसका नेताहरुले भने विरोध गरेका छन् ।काँग्रेसका जिल्ला स्तरका नेताहरुले गठबन्धनबाट संघको टिकट नमिले एक्लै चुनावमा जाने निर्णय समेत गरेका छन् । बैतडीमा गठबन्धनबाट संघको सिट माओवादीको भागमा परेपछि काँग्रेसका नेता तथा कार्यकर्ताहरुले असन्तुष्टी व्यक्त गरेका छन् । काँग्रेसले संघकोे टिकट पाउनु पर्ने माग गरिरहेका उनिहरु माथिबाट भएर आएको सहमतिले असन्तुष्ट देखिएका हुन् ।
काँग्रेसका नेता तथा कार्यकर्ताहरु माओवादीले टिकट पाए भोट नै नहाल्ने अभिव्यक्ती दिइरहेका हुन् । प्रतिनिधि सभातर्फ १६ सिट रहेको सुदूरपश्चिममा ९ सिट काँग्रेसले पाएको छ भने ४सिट माओवादीको भागमा परेका हुन् । यस्तै एकीकृत समाजवादीले ३ क्षेत्र पाएको छ ।
गठबन्धनको सहमति अनुसार प्रतिनिधि सभातर्फ जसपा १५ सिट, एकीकृत समाजवादी १७, माओवादी केन्द्रले ४४ सिट पाउने निश्चिति छ । काङ्ग्रेसले ८५ सिट लिएको छ । राष्ट्रिय जनमोर्चाको भागमा बाग्लुङ १ र प्युठान समेत दुई क्षेत्र परेको बताइएको छ ।
