बैतडी –बैतडीमा जिल्लास्तरीय प्रतिभा पहिचान कार्यक्रम सम्पन्न भएको छ । सामाजिक विकास कार्यालयको आयोजनामा बुधबार जिल्लास्तरीय प्रतिभा पहिचान कार्यक्रम सम्पन्न भएको हो ।
गणित ÷विज्ञान विधा, चित्रकला र साहित्य क्षेत्रमा प्रतिभा पहिचान गरिएको सामाजिक विकास कार्यालय बैतडीका प्रमुख शंकरदत्त जोशीले बताए । उक्त कार्यक्रममा दशरथचन्द नगरपालिका, सिगास गाउँपालिका र पञ्चेश्वर गाउँपालिकाका केही विद्यालयहरुको मात्रै सहभागिता रहेको थियो ।
९ देखि १३ बर्ष उमेर समूहका विद्यार्थीहरुको प्रतिभा खोजी गर्ने उद्देश्यसहित प्रतिभा पहिचान कार्यक्रमको आयोजना गरिएको हो ।
गणित विधाको प्रतियोगितामा सिगासको अर्जुन माविका सुनिल बोहरा प्रथम भएका छन् भने विज्ञान विधामा दशरथचन्द नगरपालिका शाहीलेकस्थित वीरेन्द्र माविका रमेश ओझा प्रथम भएका छन् ।
यस्तै चित्रकला विधामा वीरेन्द्र माविकै भूमिका कनौजिया प्रथम भएकी छन् । साहित्यतर्फको विधामा सिगासको लेकलुपुण माविकी संगीता बोहराको टिम प्रथम भएको छ ।
यस्तै चित्रकला विधामा सिगासका सुनिल लुहार दोश्रो भएका छन् ।
प्रतियोगितामा प्रथम हुनेलाई रु पाँच हजार, द्वितीयलाई तीन हजार, तृतीयलाई दुई हजार र सान्त्वना स्थान प्राप्त गर्नेलाई एक हजारका दरले पुरस्कार वितरण गरिएको सामाजिक विकास कार्यालय बैतडीका प्रमुख जोशीले बताए ।
प्रतियोगितामा बैतडीका १० वटै स्थानीय तहका विद्यालयका ९ देखि १३ वर्षका विद्यार्थीलाई सहभागि गराउन पत्राचार गरिए पनि दशरथचन्द नगरपालिका, सिगास गाउँपालिका र पञ्चेश्वर गाउँपालिकाले मात्र सहभागिता जनाएको उनले बताए ।
बालप्रतिभाको खोजी गर्न आयोजना गरिएको कार्यक्रममा सिगास गाउँपालिकाबाट गाडी रिजर्भ गरेर नौ जना विद्यार्थीलाई प्रतियोगितामा सहभागी गराएको गाउँपालिकाका शिक्षा अधिकृत रमेशप्रसाद भट्टले बताए ।
उनले दुर्गमको क्षेत्र भए पनि जिल्ला र प्रदेश स्तरीय कुनै पनि प्रतियोगता नछाडिएको जानकारी दिए । सदरमुकाम आसपासकै स्थानीय तहले भने प्रतियोगितामा विद्यार्थीे सहभागी गराउन चासो नदेखाएको सामाजिक विकास कार्यालय जनाएको छ ।
