काठमाडौंः अविरल वर्षाका कारण मुलुकका विभिन्न स्थानमा गएको पहिरोमा परी देशैभरी ७० जनाको मृत्यु भएको छ भने ८६ जना घाइते भएका छन्।

गएको २४ घण्टायता मात्र ५२ जनाभन्दा बढीको ज्यान बाढीपहिरोले लिएको छ। नेपाल प्रहरीका अनुसार निरन्तरको वर्षाले काठमाडौंसहित गण्डकी र लुम्बिनी प्रदेशका विभिन्न जिल्लामा आएको बाढी–पहिरोले जनधनको व्यापक क्षति भएको छ। शुक्रबार रातिदेखि परेको अविरल बर्षाका कारण पाँच जना बेपत्ता भएका छन्। लगातारको वर्षाका कारण हालसम्म ८६ घरमा ठूलो क्षति भएको छ।

यस्तै वर्षाका कारण ३३५ पशु चौपायाको मृत्यु भएको प्रहरीले जनाएको छ। हालसम्म अविरल बर्षा, पहिरो, चट्याङ तथा बाढी गएको ठाउँमा ४ हजार ७ सय ९० जना प्रहरी परिचालन गरिएका छन् । साथै बाढी र पहिरोका कारण पछिल्लो दुई दिनमा ९ करोड ५६ लाख ७४ हजार २ सय ५० रूपैयाँ क्षति भएको प्रहरीले जनाएको छ।