बैतडी–बैतडीको शिवनाथ गाउँपालिका–२ शर्मालीस्थित ग्राम प्रकाश बहुमुखी क्याम्पसको स्ववियु सभापतिमा नेपाल विद्यार्थी संघकी कविता साउँद पुरै प्यानलसहित विजयी भएकी छन् ।
आज भएको स्वतन्त्र विद्यार्थी युनियनको निर्वाचनमा नेविसंघकी साउँदले ३७ मत प्राप्त गरिन् भने उनकी निकटतम् प्रतिस्पर्धी अनेरस्ववियुकी सरीता साउँदले २८ मत प्राप्त गरिन् । ग्राम प्रकाश बहुमुखी क्याम्पसमा नेविसंघको पुरै प्यानल विजयी भएको निर्वाचन अधिकृत महामलसिंह साउँदले बताए ।
यस्तै सचिवमा नेविसंघकी अस्मिता महरले ३५ मत प्राप्त गरेर विजय हासिल गरिन् भने उनकी निकटतम प्रतिस्पर्धी अनेरस्ववियुका विरेन्द्र साउँदले ३० मत प्राप्त गरे ।
यस्तै कोषाध्यक्षमा नेविसंघकी रतना साउँद ३५ मत ल्याएर विजयी भइन् भने उनका निकटतम प्रतिस्पर्धी अनेरास्ववियुकी कल्पना पार्कीले ३० मत ल्याइन् ।
यस्तै सदस्यहरुमा नेविसंघका बाटिका साउँदले ३५, हिमा कलौनीले ३६ र रुमला साउँदले ३८ मत ल्याएर विजय हासिल गरेका छन् ।
यस्तै समानुपातिकतर्फ नेविसंघले ३३ मत ल्याउँदा अनेरास्ववियुले २२ मत प्राप्त गरेको निर्वाचन अधिकृत साउँदले बताए ।
९५ जना विद्यार्थी मतदाता रहेको ग्राम प्रकाश बहुमुखी क्याम्पसमा ६६ मत खसेकोमा १ मत बदर भएको थियो ।
