बैतडी –सुदूरपश्चिम प्रदेशका मुख्यमन्त्री कमलबहादुर शाह र भारतको उत्तराखण्ड प्रदेशका मुख्यमन्त्री पुष्करसिंह धामीबीच भेटवार्ता भएको छ ।
भारत भ्रमणमा रहेका मुख्यमन्त्री शाहले शनिबार उत्तराखण्डका मुख्यमन्त्री धामीसँग भेटवार्ता गरेका हुन् । मुख्यमन्त्री धामीको सरकारी निवासमा भएको भेटमा नेपाल–भारतसँग सम्बन्धित विभिन्न समसामयिक विषयमा छलफल भएको जनाइएको छ ।
सांस्कृतिक, धार्मिक र सामाजिक दृष्टिकोणबाट नेपाल र भारतबीच गहिरो समानता छ । दुवै देशको परम्परा, रीतिरिवाज, भाषा, खानपान र जीवनशैलीमा धेरै समानता छन् । जसले वर्षौंदेखि आपसी सम्बन्ध र विश्वासलाई बलियो बनाउँदै आएको छ । दुवै देशका सम्बन्धलाई बलियो बनाउने बिषयमा दुवै नेताहरुबीच छलफल भएको बताइएको छ ।
यसअघि मुख्यमन्त्री शाहले शुक्रबार उत्तराखण्ड प्रदेशका वनमन्त्री सुवोद उनियाल, पर्यटनमन्त्री सतपाल महाराज र कृषिमन्त्री गणेश जोशीसँग छुट्टाछुट्टै भेटघाट गरेका थिए ।
भारत सरकारको निमन्त्रणमा सुदूरपश्चिम प्रदेशका मुख्यमन्त्रीको नेतृत्वको १० सदस्यीय टोली यही वैशाख १६ गतेदेखि एकसाताको भारत भ्रमणमा रहेको छ । उक्त टोली वैशाख २२ गते स्वदेश फर्किने कार्यतालिका छ ।
