बैतडी–बैतडीको पञ्चेश्वर गाउँपालिकाको प्रमुख प्रशासकीय अधिकृतको जिम्मेवारी रामसागर शाहलाई दिइएको छ ।
संघीय मामिला तथा सामान्य प्रशासन मन्त्रालयले गाउँपालिकामा कार्यरत बरिष्ठतम् कर्मचारी शाहलाई प्रमुख प्रशासकीय अधिकृतको जिम्मेवारी दिएको हो । गाउँपालिकाले पठाएको पत्र तथा स्थानीय सरकार सञ्चालन ऐन २०७४ अनुसार शाहलाई अर्को व्यवस्था नहुञ्जेलसम्मका लागि प्रमुख प्रशासकीय अधिकृतको जिम्मेवारी दिइएको मन्त्रालयले जनाएको छ ।
गाउँपालिकाको स्वास्थ्य शाखा प्रमुखको रुपमा कार्यरत शाहलाई आर्थिक तथा प्रशासनिक अधिकारको जिम्मेवारी दिएपछि अब गाउँपालिकाका आर्थिक तथा प्रशासनिक कामहरु अघि बढ्ने भएका छन् । मन्त्रालयले अर्को व्यवस्था नहुञ्जेल तथा अर्को प्रमुख प्रशासकीय अधिकृत नखटाउञ्जेलसम्म शाहलाई प्रमुख प्रशासकीय अधिकृतको कामकाज गर्न भनेको छ ।
यसअघि गाउँपालिकाका प्रमुख प्रशासकीय अधिकृत महेश पार्कीको सरुवा भएपछि पञ्चेश्वर गाउँपालिका प्रमुख प्रशासकीय अधिकृत विहिन भएको थियो ।
