बैतडी –रुसी सेनामा भर्ती भएर रुस–युक्रेन युद्धमा संलग्न बैतडीको मेलौली नगरपालिका –९ असुरका ४२ बर्षीय अर्जुनदत्त भट्टको मृत्यु भएको पुष्टि भएको छ । उनको लडाईँको क्रममा मृत्यु भएको जानकारी आएको स्थानीय लोकमणी भट्टले बताए ।
नेपाली सेनाबाट अवकाशप्राप्त भट्ट डेढ बर्ष अघि रुस गएका बताइएको छ । २०८० मंसिरसम्म परिवारको सम्पर्कमा रहेका उनी पछिल्लो समयमा परिवारको सम्पर्कमा रहेका थिएनन् ।
डिएनए परीक्षणबाट भट्टको मृत्यु भएको पुष्टि गरिएको बताइएको छ । तर कहिले उनको मृत्यु भएको हो भन्ने कुरा भने एकीन नभएको बताइएको छ । मृतक भट्टका घरमा श्रीमती र एक छोरा रहेका छन् । भट्टको मृत्यु भएको खबर आएपछि हिन्दूसंस्कार अनुसार उनको काजकिरिया भइरहेको मेलौली नगरपालिका–९ का वडा अध्यक्ष लोकराज भट्टले जानकारी दिए ।
गाउँकै एक होनहारको युवाको रुसमा मृत्यु भएपछि असुर गाउँ शोकमा डुबेको अध्यक्ष भट्टले बताए । उनी राष्ट्रिय स्वतन्त्र पार्टीको मेलौली नगर सभापति समेत रहेका थिए ।
परराष्ट्र मन्त्रालयले पछिल्लो पटक भट्टसहित थप २३ जनाको मृत्यु भएको प्ुष्टि गरेको छ । जसमा सुदूरपश्चिमबाट बैतडीका अर्जुनदत्त भट्ट र दार्चुलाका ललितसिंह डोबालको मृत्यु भएको जनाइएको छ ।
परराष्ट्र मन्त्रालयका अनुसार नवलपरासीका हेमकुमार मगर, सल्यानका ताराप्रकाश घर्ती, संखुवासभाका रामकृष्ण अधिकारी, कास्कीका गीतबहादुर घर्तीमगर, बागलुङका मख्खनबहादुर पुनको पनि रुस–युक्रेन युद्धमा मृत्यु भएको छ ।
यस्तै मकवानपुरका रामकुमार प्रधान, मोरङका रोनल मिश्र, प्युठानका भीमबहादुर घर्तीमगर, म्याग्दीका छमबहादुर घर्ती, सुर्खेतका सुजन शर्मा र रुकुम पश्चिमका रामकुमार बुढामगरको पनि मृत्यु भएको छ ।
ठेगाना नखुलेका अन्य १० जना लरबहादुर बुढा, नेत्रबहादुर थापा, विकास राई, रूपक राई, महेन्द्र मल्ल, अशोक जीसी, अमृत थापा आलेमगर, उदयराज थारु, प्रितम राई र प्रेमबहादुर लुंगेलीमगरको पनि मृत्यु भएको परराष्ट्र मन्त्रालयले जनाएको छ ।
उनीहरूको पुस ९ यता मृत्यु भएको परराष्ट्र मन्त्रालयले जनाएको हो । योसँगै रुसी सेनामा भर्ती भएर युक्रेनसँगको युद्धमा मारिने नेपालीको सङ्ख्या ७३ जना पुगेको छ ।
