बैतडी–बैतडीमा प्रहरीले भारतबाट ल्याएको प्रतिबन्धित बिँडी बरामद गरेको छ । करीब ३ लाख ३० हजार रुपैयाँ बराबरको प्रतिबन्धित बिँडीसहित जिप चालक र साहुलाई पनि नियन्त्रणमा लिइएको जिल्ला प्रहरी कार्यालय बैतडीका प्रवक्ता प्रहरी निरीक्षक बल्देव बडूले बताए ।
प्रतिबन्धित बिँडी ओसारपोसार भइरहेको गोप्य सूचनाका आधारमा जिल्ला प्रहरी कार्यालयबाट खटिएको सादा पोशाकको प्रहरी टोली र पुरघाट प्रहरीचौकीबाट खटिएको प्रहरी टोलीले पुर्चौडी नगरपालिका –१० विजयपुरबाट बिहीबार बिहानको समयमा बिँडी बरामद गरेको हो ।
विजयपुरबाट हाटतर्फ जाँदै गरेको सुपप्र ०१००१ ज १७१३ नम्बरको बोलेरो जिपसहित चालक सिगास गाउँपालिका– २ का २२ बर्षीय मानसिंह धामी र पुचौँडी नगरपालिका– १० विजयपुरका गाडीधनी २८ वर्षीय दिनेश महरालाई नियन्त्रणमा लिएर अनुसन्धान भइरहेको प्रहरी निरीक्षक बडूले बताए ।
बरामद गरिएको प्रतिबन्धित बिँडीसहित गाडी, चालक र साहुलाई आवश्यक कारवाहीका लागि आज महाकाली भन्सार कार्यालयमा बुझाइने प्रहरीले जनाएको छ । उक्त बिँडी भारतबाट अवैध रुपमा ल्याएको बुझिएको छ ।
यसअघि जेठ ४ गतेपनि २ लाख ८२ हजार रुपैयाँ बराबरको प्रतिबन्धित बिँडी बरामद गरिएको थियो ।
