बैतडी–बैतडीमा पहिरोले एक घर पुरिएको छ ।
जिल्लाको पुर्चौंडी नगरपालिका–४ चनकिल्ली बस्ने हिमालय बोहराको घर शुक्रबार राति खसेको पहिरोले पुरिएको जिल्ला प्रहरी कार्यालय बैतडीका प्रवक्ता प्रहरी निरीक्षक बल्देव बडूले बताए ।
अविरल बर्षासँगै शुक्रबार राति १२ बजेतिर घरमाथिबाट खसेको पहिरोले बोहराको तीन तले ९ कोठे घर पूर्ण रुपमा क्षति भएको प्रहरी निरीक्षक बडूले बताए ।
पहिरो खस्न लागेको थाहा भएपछि घरका मानिस बाहिर निस्केकाले मानवीय क्षति नभएको बताइएको छ ।
पहिरोका कारण बोहराको गोठमा बाँधेका एक भैंसी, एक पाडो र एक बाख्रो भने पहिरोमा पुरिएका प्रहरी निरीक्षक बडूले बताए । यस्तै घरभित्रका अन्नपात, लत्ताकपडा लगायत सबै सामग्री नष्ट भएका उनले बताए ।
अहिले घटनास्थलमा प्रहरीको टोली र स्थानीयहरुले पहिरो पन्छ्याउने कार्य गरिरहेका छन् । पहिरोले घर पुरिँदा भएको क्षतिको विस्तृत विवरण भने आउन बाँकी रहेको छ ।
घर पहिरोले पुरेपछि बोहराको ११ जनाको परिवार अहिले छिमेकी मोतीराम बोहराको घरमा बसीरहेका प्रहरी निरीक्षक बडूले बताए ।
