बैतडी–जेन जी पुस्ताको प्रदर्शनका क्रममा आगजनी र तोडफोड गरेर बैतडी कारागारबाट भागेका ६२ जना कैदीबन्दी तथा थुनुवामध्ये ४० जना कारागारमा पुगेका छन् ।
भदौ २४ गते राति बन्दीगृहमा आगजनी र तोडफोड गरेर भागेका मध्ये ४० जनालाई नियन्त्रणमा लिइसकेको जिल्ला प्रहरी कार्यालय बैतडीका प्रवक्ता, प्रहरी निरीक्षक बलराम पाण्डेयले जानकारी दिए ।
प्रहरीले सूचनामार्फत भागेका कैदीबन्दी तथा थुनुवाहरुलाई आत्मसमर्पण गर्न आग्रह गरेको छ । भागेकामध्ये केही आँफै प्रहरीको सम्पर्कमा आएका छन् भने केहीलाई प्रहरीले पक्राउ गरेर ल्याएको प्रहरी निरीक्षक पाण्डेयले बताए ।
भागेका मध्ये चारजनालाई भारतबाट पक्राउ गरेर कारागारमा ल्याइएको छ । भारतीय सीमा सुरक्षा बलको सहयोगमा भारतको पिथौरागढ आसपासबाट पक्राउ परेका चारै जनालाई कारागारमा ल्याइसकेको प्रहरी निरीक्षक पाण्डेयले बताए ।
बैतडी कारागारमा ५४ जना कैदीबन्दी र ८ जना थुनुवा रहेका छन् । जेन जी पुस्ताको आन्दोलनको क्रममा उनीहरु सबै भागेका थिए ।
कारागारबाट भागेकाहरुलाई सम्पर्क आउन प्रहरीले आग्रह गरेको र सम्पर्कमा नआउने कानुन अनुसार कारवाही हुने प्रहरी निरीक्षक पाण्डेयले बताए ।
