बैतडी –बैतडीको दशरथचन्द नगरपालिका–५ स्थित दशरथचन्द मावि सुन्दरखालीले अभिभावकहरुको भेला गर्दै विद्यालयमा सञ्चालन गरिएको त्रैमासिक परीक्षाको नतिजा सार्वजनिक गरेको छ ।
बिहीबार विद्यालयमा अभिभावकहरुको भेलामा परीक्षाको नतिजा पनि सार्वजनिक गरिएको विद्यालयका प्रधानाध्यापक नरेन्द्रबहादुर चन्दले बताए । बालबालिकाहरुको शैक्षिक अवस्थाका बिषयमा अभिभावकहरुलाई समेत जानकारी होस् भन्ने उद्देश्यले अभिभावक भेला बोलाएर परीक्षाफल प्रकाशित गरिएको उनले बताए ।
सामुदायिक विद्यालयहरुको शैक्षिक गुणस्तर सुधारका लागि अभिभावकहरु पनि उत्तिकै सक्रिय हुनुपर्ने आवश्यकता रहेकाले अभिभावक भेलाको आयोजना गरिएको प्रधानाध्यापक चन्दले बताए । भेलामा अधिकांश अभिभावकहरुको उपस्थिती रहेको थियो । उनले भने, ‘हामीले विद्यालयको शैक्षिक गुणस्तर सुधारको प्रयास गरेका छौं । यसमा अभिभावकहरुको पनि साथ खोजेका छौं । त्यसैले बेला–बेला अभिभावकहरुको भेला बोलाउने गरेका छौं ।’
वडा सदस्य नन्दा भट्ट समेतको उपस्थितीमा अभिभावक भेलाको आयोजना गरिएको र उक्त भेलामा परीक्षाफल समेत प्रकाशित गरिएको प्रधानाध्यापक चन्दको भनाइ छ ।
सामुदायिक विद्यालयमा अध्ययनरत आफ्ना बालबालिकाहरुको शैक्षिक अवस्थाका बिषयमा अभिभावकहरुले पनि चासो राख्नुपर्ने भएकाले भेलामै परीक्षाको नतिजा सार्वजनिक गरिएको विद्यालयले जनाएको छ ।
दशरथचन्द मावि सुन्दरखालीलाई नमूना सामुदायिक विद्यालयको रुपमा विकसित गर्ने आफूहरुको योजना रहेको विद्यालय व्यवस्थापन समितिकी अध्यक्ष पार्वती चन्दले बताइन् । आफू दोश्रो कार्यकालका लागि विद्यालय व्यवस्थापन समिति अध्यक्षमा चयन भएको बताउँदै उनले विद्यालयमा केही सुधार गर्ने अठोट रहेको उनले सुनाइन् ।
कक्षा १२ सम्मको पढाइ हुने दशरथचन्द मावि सुन्दरखालीले शैक्षिक गुणस्तर सुधारका लागि कक्षाकोठाको पढाइका साथै अतिरिक्त क्रियाकलापमा समेत जोड दिएको छ ।
अभिभावकहरुको भेलामा दशरथचन्द माविका पूर्व विद्यार्थी, जिल्ला अस्पताल बैतडीमा कार्यरत डाक्टर टेकेन्द्र नेपाली, इन्जिनियर अशोक नेपाली र अमित नेपालीका बुवा धनीराम दमाईलाई सम्मान समेत गरिएको प्रधानाध्यापक चन्दले बताए ।
