बैतडी–बैतडीको सुर्नया गाउँपालिकामा तालाबन्दी गरिएपछि सेवाग्राही मारमा परेका छन् ।
गएको शुक्रबार आफूहरुले माग गरेको सूचना नदिएको भन्दै जेनजी समूहका तर्फबाट गाउँपालिकामा तालाबन्दी गरिएको थियो । गाउँपालिकामा तालाबन्दी भएपछि पालिकाका सबै कामकाज रोकिएका छन् ।
गाउँपालिकामा तालाबन्दी भएपछि विभिन्न सेवाका लागि गाउँपालिका पुग्ने नागरिकहरुलाई भने सास्ती भएको छ ।
यता तालाबन्दी गरेपछि जेनजी समूहले सोमबार साझा छलफल गर्ने तयारी गरेको छ । आफूहरुका मागका बिषयमा सबै सरोकारवालाहरुलाई जानकारी दिने उद्देश्यले सुर्नया गाउँपालिका –४ को बागथलामा साझा छलफलको आयोजना गरिएको जेनजी अगुवा विशाल भट्टले बताए ।
साझा छलफलमा आफूहरुले गाउँपालिकामा तालाबन्दी गर्नुको कारण र आफ्ना मागहरुको बिषयमा सबैलाई जानकारी गराउने उनले बताए । आफूहरु वार्ता र सम्वादकै माध्यमबाट समस्याको समाधान गर्न तयार रहेको र यसका लागि गाउँपालिका तयार हुनुपर्ने उनले बताए ।
यता गाउँपालिका अध्यक्ष अम्मरबहादुर कुँवरले पनि समस्या समाधानको छलफलबाटै गरिने बताए । तालाबन्दी गर्ने पक्षसँग छलफल गरेर समस्याको समाधान गरिने उनको भनाइ छ ।
