बैतडी –बैतडीमा जिप र मोटरसाइकल एकआपसमा ठोक्किँदा दुई जना घाइते भएका छन् ।
आइतबार दिउँसो ४ बजेतिर पाटनबाट सतबाँझतर्फ आइरहेको से १ ज ३७३ नम्बरको जिप र सतबाँझबाट पाटनतर्फ गइरहेको बा.प्र ०२०१६ प००४२ नम्बरको अनटेस्ट मोटरसाइकल दशरथचन्द राजमार्ग अन्तगर्त सुर्नया गाउँपालिका –२ सिउडेमा एकआपसमा ठोक्किएका हुन् ।
उक्त दुर्घटनमा मोटरसाइकल चालक बझाङको जयपृथ्वी नगरपालिका–३ का ईश्वर ओली र मोटरसाइकल पछाडि सवार बझाङकै थलारा गाउँपालिका–९ का ३० बर्षीय श्याम खड्का घाइते भएका छन् । घाइते दुवै जनाको जिल्ला अस्पताल बैतडीमा उपचार भइरहेको छ । उनीहरुको अवस्था मध्यम रहेको जिल्ला प्रहरी कार्यालय बैतडीका प्रवक्ता, प्रहरी निरीक्षक बल्देव बडूले बताए ।
दुर्घटनापछि जिप चालक फरार रहेका र उनको खोजी कार्य भइरहेको प्रहरी निरीक्षक बडूले बताए । जिप चालकको परिचय समेत नखुलेको उनले बताए ।
घटनाका बिषयमा प्रहरीले थप अनुसन्धान गरिरहेको छ ।
