बैतडी –बैतडीको पाटन नगरपालिका–४ ज्यौडेस्थित मसानी दलित आधारभूत विद्यालयमा यो शैक्षिक सत्रदेखि अंग्रेजी माध्यमबाट पठनपाठन शुरु गरिएको छ ।
यो बर्षदेखि नर्सरी कक्षा सञ्चालन गरेर अंग्रेजी माध्यमबाट पठनपाठन शुरु गरिएको स्थानीय समेत रहेका उपप्राध्यापक मानबहादुर चन्दले बताए । अधिकांश दलित समुदायका बालबालिकाहरु अध्ययनरत रहेको सो विद्यालय बन्द हुने अवस्थामा पुगेपछि अंग्रेजी माध्यमबाट पठनपाठन शुरु गरिएको उनले बताए ।
स्थानीय अभिभावकहरुको भेला बोलाएर नयाँ विद्यालय व्यवस्थापन समिति चयन गर्नुका साथै यो बर्षदेखि नर्सरी कक्षा सञ्चालन गरिएको चन्दले बताए । बोर्डिङ पढाउने भन्दै गाउँका बालबालिकाहरुलाई अन्यत्र भर्ना गर्न थालिएको विद्यालयले अंग्रेजी माध्यमबाट पठनपाठन शुरु गरेको हो ।
यसैबीच विद्यालयमा अंग्रेजी माध्यमबाट पठनपाठन शुरु गरेपछि काठमाण्डौं निवासी समाजसेवी सहदेव सापकोटा पुस्तक सहयोग गरेका छन् ।
नर्सरी कक्षाका लागि अंग्रेजी माध्यमबाट २० सेट पुस्तक उनले निशुल्क रुपमा उपलब्ध गराएको चन्दले बताए ।
यस अघि पनि सापकोटाले यस क्षेत्रका विद्यालयमा पोशाक, अनाथ बालबालिकालाई छात्रवृत्ति तथा गरिब व्यक्तिहरुको उपचारमा सहयोग गरिसकेका छन् ।
