बैतडी–बैतडीको पाटन नगरपालिका–६ स्थित प्रसिद्ध श्री उदयदेव मन्दिरमा ‘मैतड जात’ भनेर चिनिने वार्षिक जात्रा आज (कात्तिक १ गते) देखि सुरु भएको छ ।
यस वर्ष तिथि घटबढका कारण केही द्विविधा देखिए पनि उदयदेव मन्दिरमा आज महाष्टमीको विशेष पूजाआजा भइरहेको र भोलि कात्तिक २ गते महानवमीका अवसरमा राँगाको बलिसहित मुख्य जात्रा सञ्चालन हुने मन्दिरका सहायक पुजारी लवदेव जोशीले जानकारी दिनुभयो ।
तिथि गणनाको हिसाबले आज कात्तिक १ गते महाष्टमी र भोलि २ गते महानवमी मानिने भएकाले सोही अनुसार धार्मिक विधिपूर्वक पूजाआजा तथा जात्रा आयोजना गरिएको पुजारी जोशीको भनाइ छ । उदयदेव मन्दिरमा हरेक वर्ष महाष्टमी र महानवमीको अवसरमा ठूलो मेला तथा जात्रा लाग्ने गर्दछ ।
जात्रालाई भव्य, सभ्य र अनुशासित वातावरणमा सम्पन्न गर्नका लागि जात्रा हुने क्षेत्रलाई मदिरा निषेधित क्षेत्र घोषणा गरिएको छ । सिद्धनाथ उदयदेव धार्मिक क्षेत्र विकास समितिका उपाध्यक्ष चमनकुमार भण्डारीका अनुसार जात्रालाई व्यवस्थित बनाउन समितिका तर्फबाट सम्पूर्ण शान्ति सुरक्षा तथा व्यवस्थापकीय तयारी पूरा भइसकेको छ ।
उदयदेव मन्दिरको दर्शन तथा जात्रा अवलोकनका लागि बैतडीका विभिन्न स्थानका साथै छिमेकी जिल्ला र भारतबाट समेत ठूलो संख्यामा भक्तजनहरू आउने क्रम सुरु भइसकेको छ ।
