कैलाली –कैलालीको गोदावरी नगरपालिका–४ स्थित बन्देवी फायरिङ रेञ्जमा नेपाली सेनाको फायरिङ अभ्यासका क्रममा प्लास्टिक ह्याण्ड ग्रिनेड विस्फोट हुँदा दुई सैनिक घाइते भएका छन् । 

आज बिहान सवा ८ बजेतिर देवदल गण, आर्मी ब्यारेकको सैन्य तालिम अन्तर्गत फायरिङ अभ्यास चलिरहेका बेला प्लास्टिक ह्याण्ड ग्रिनेड विस्फोट भएको थियो । विस्फोटमा सहायक सेनानी ३० बर्षीय विक्रम कार्कीको दाहिने हात र अनुहारमा तथा सैनिक २० वर्षीय रञ्जित थारुको दाहिने हातमा चोट लागेको ईलाका प्रहरी कार्यालय मालाखेतीका डिएसपी हिरा महराले बताए ।

उनले घाइते दुवै जनालाई घटनालगत्तै उपचारका लागि फिल्ड मार्सलबाट नेपाली सेनाको आर्मी अस्पताल, बोराडाँडी पुर्याएको बताएका छ्न । उनीहरूको स्वास्थ्य अवस्था मध्यम रहेको बताइएको छ ।