बैतडी –बैतडीको रौलाकेदार धाममा केदारनाथ ज्योतिर्लिङ्ग स्थापना भएको छ । नेपालका प्रथम ऐतिहासिक जगद्गुरु बालसन्त मोहनशरण देवाचार्यले ज्योतिर्लिङ्ग स्थापना गरेका हुन् । ज्योतिर्लिङ्ग स्थापनाका लागि मन्दिरको निर्माण गरिएको छ ।
रौलाकेदार मन्दिर नजिक रहेको दुले भन्ने स्थानमा निर्माण गरिएको मन्दिरमा ज्योतिर्लिङ्ग स्थापना गरिएको हो ।
गत माघ १८ गते देखि निर्माण थालिएको ज्योतिर्लिङ्ग मन्दिरको निर्माण कार्य सम्पन्न भएपछि आज विधिवत रुपमा ज्योतिर्लिङ्ग स्थापना गरिएको सुर्नया गाउँपालिकाका अध्यक्ष अम्बर बहादुर कुवँरले जानकारी दिए ।
मंगलबार ज्योतिर्लिङ्ग स्थापना लागि निर्माण गरिएको मन्दिरको पुजाआजा सहित उद्दघाटन गरिने बताइएको छ । सुर्नया गाउँपालिकाका अध्यक्ष अम्मरबहादुर कुवँर र दोगडाकेदार गाउँपालिका अध्यक्ष चक्रबहादुर कार्कीले मंगलबार पुजाआजासहित मन्दिरको उद्घाटन गर्ने कार्यक्रम रहेको छ ।
जगद्गुरुका अनुसार भगवान शिवका बाह्र ज्योतिर्लिङ्ग मध्ये केदारनाथ ज्योतिर्लिङ्ग रौलाकेदार हो । पौराणिक रावलाद्री पर्वतमा केदारनाथ ज्योतिर्लिङ्ग रहेको पुराणहरुमा उल्लेख गरिएको समेत जगद्गुरुले बताएका छन् ।
