इजा –
इसोइ छ प्रकृती रित छोरी पराया घर !!
काज–बार सुर्ता तेरै आए माइत्या घर !!
चेली –
कसा छन गाउँघर तिर कसा छन बुवा !!
सुकेरी छै दुखमा छैइ जन्मदिन्या मुमा !!
इजा –
जति छिप्या लै फुस्रो हुदो गोधरीको माटो !!
मुइ बाटो हेरिरौलो नाना तेरा आउन्या बाटो !!
चेली –
बाइग्यो इजु पुस्या पन्ध्र, नरहरी बोलाए !!
मुइ आगो घुरुलो इजु, तुइ बाडुली लाए !!
इजा –
बासाको चुलाको आगो घुरुन्छ फिनफिन !!
घुटुक बाडुली लाग्दी याद औनि छिनछिन !!
चेली –
पाखाका फर्सिका दाना पाखै हुन्ना माइत !!
दिन–बार हेरि आउलो हेरि आउलो साइत !!
इजा –
तेर दादा पठुलो नाना, नन्दिना ल्याउनाकी !!
को खान्छ फर्सिका दाना नखाए प्याउलागी !!
चेली –
ब्यानलको मल्या कौवा पाखामाको सेल !!
मुइ आउलो अठ्ठाइस पैट मेरि इजुका देल !!
इजा –
नातीको तो तोते बोली रिटन्छ आखामा !!
कव्वाकी लाई सेलरोटी राखलो पाखामा !!
चेली –
चन्वा भैंसी दूध दिन्या छाइ बनौन्या आमा !!
नानो हुन्या बोलाउ भन्छ मेरा नाना मामा !!
इजा –
आउन्या बेला फोन गरे फाम गरे गाडीमा !!
नाना आलि लिखु पेल्ला छाडिर्यु बारिमा !!
चेली –
झप्वा बाकरीका घाणा बजुन्थ्या टिनटिन !!
कुल्याकि धुपबत्ती गर्ला सक्रान्तिका दिन !!
इजा –
सख्खर पिंडु खन्नाइछन तुइ भनी रुक्याछौ !!
रुखै छन सुन्तला दाना, तोइ भनी कुर्याछौ !!
चेली –
यइ पाली पानी नाइ पर्यो गहुँवारि सुकिगै !!
राख्याका चिज संगै खाउला नरहरी पुगिगै !!
इजा –
फेसबुकका गित मार्फत दोहोरि लेखाया !!
झट्ट आए मेरि नाना, मेरि रइबार पाया !!
–विष्णु जोशी ‘अँठोला’
शैल्यशिखर नगरपालिका –०७, दार्चुला
हाल–शैल्यशिखर नगरपालिकामा सहायक चौथो पदमा कार्यरत
