बैतडी –नेकपा एमाले बैतडीले १० ओटै स्थानीय तहमा चुनावी समीक्षा कार्यक्रमको आयोजना गर्ने भएको छ ।
हालै सम्पन्न प्रतिनिधि सभा सदस्य निर्वाचनमा एमाले पराजित भएपछि पार्टीले चुनावी समीक्षा कार्यक्रमको आयोजना गर्न लागेको एमाले बैतडीका अध्यक्ष नरेशकुमार विश्वकर्माले जानकारी दिए ।
फागुन २७ गतेदेखि चैत ३ गतेसम्म सबै पालिकामा प्रतिनिधि सभा सदस्य उम्मेदवार एवं केन्द्रीय सदस्य दामोदर भण्डारीसहितको उपस्थितिमा कार्यक्रम सञ्चालन गरिने उनले बताए ।
फागुन २७ गते दोगडाकेदार गाउँपालिकाको खोचलेक र डिलाशैनी गाउँपालिकाको पङसेरामा कार्यक्रमको आयोजना गरिने तय भएको छ ।
यस्तै फागुन २८ गते पुर्चौंडी नगरपालिकाको हाट, फागुन २९ गते सिगास गाउँपालिकाको गर्जे, फागुन ३० गते सुर्नया गाउँपालिकाको रौलेश्वर, चैत १ गते पञ्चेश्वर गाउँपालिकाको आमचौरा र शिवनाथ गाउँपालिकाको सुल्लेखानमा कार्यक्रम आयोजना गरिनेछ ।
यस्तै चैत २ गते मेलौली नगरपालिकाको पार्टी कार्यालय र पाटन नगरपालिकाको सभाहलमा कार्यक्रम सञ्चालन गर्ने तयारी भएको छ ।
चैत ३ गते दशरथचन्द नगरपालिकाको जिल्ला पार्टी कार्यालयमा कार्यक्रम गरी चुनावी समीक्षा सम्पन्न गरिने एमाले बैतडीले जनाएको छ ।
२०७० सालदेखि बैतडीमा लगातर जित्दै आएको एमाले यो निर्वाचनमा तेश्रो भएको छ । यो निर्वाचनमा राष्ट्रिय स्वतन्त्र पार्टीका हरिमोहन भण्डारी २२ हजार १३४ मतसहित विजयी भएका छन् । एमाले उम्मेदवार दामोदर भण्डारी १७ हजार ९१ मतसहित तेस्रो स्थानमा सीमित भएका छन् ।
