बैतडी–बैतडीको शिवनाथ गाउँपालिका–१ स्थित नागार्जुन आधारभूत स्वास्थ्य केन्द्रमा सञ्चालन भएको निशुल्क स्वास्थ्य शिविरमा १ सय २३ जनाले सेवा लिएका छन् ।
स्वास्थ्य कार्यालय बैतडीको प्राविधिक सहयोग तथा शिवनाथ गाउँपालिकाको समन्वयमा आज एक दिने शिविर सञ्चालन गरिएको स्वास्थ्य केन्द्रका प्रमुख जीवनसिंह साउँदले बताए ।
उक्त शिविरमा ३१ जना गर्भवती महिला र ९२ जना अन्य सेवाग्राहीले सेवा लिएका उनले बताए ।
शिविरमा नसर्ने रोगहरूको परीक्षण, रक्तचाप तथा ब्लड सुगर जाँच, गर्भवती महिलाका लागि ग्रामीण अल्ट्रासाउण्ड सेवा, दीर्घ श्वासप्रश्वास, मृगौला, क्यान्सर र हृदयसम्बन्धी रोगहरूको जाँच तथा परामर्श प्रदान गरिएको थियो । साथै मानसिक स्वास्थ्य परामर्श, स्वास्थ्य सचेतना कार्यक्रम तथा निःशुल्क औषधि वितरण समेत गरिएको साउँदले बताए ।
ग्रामीण भेगका नागरिकहरुलाई लक्षित गरेर सञ्चालन भएको शिविरबाट स्थानीय नागरिक लाभान्वित भएका वडा अध्यक्ष बल्देवसिंह चाडले बताए ।
शिविरमा चिकित्सकसहितको स्वास्थ्यकर्मीहरुको टोलीले सेवा दिएको साउँदले बताए । गाउँमै चिकित्समार्फत सेवा पाएपछि स्थानीय नागरिक खुशी भएको उनको भनाइ छ ।
