बैतडी–बैतडीको सुर्नया गाउँपालिकाका विभिन्न वडामा नेपाल टेलिकमको नेटवर्कले काम नगर्दा समस्या भएको भन्दै टेलिकम कार्यालय बैतडीका प्रमुखलाई ज्ञापन पत्र बुझाइएको छ ।
सुर्नया गाउँपालिकाका अध्यक्ष अम्मरबहादुर कुँवरले बुधबार टेलिकम बैतडीका प्रमुख नारायणदत्त भट्टलाई ज्ञापन पत्र बुझाएका छन् । गाउँपालिकाको वडा नं ६ र अन्य ठाउँमा समेत टेलिकमको नेटवर्कले काम नगर्दा समस्या भएको ज्ञापन पत्रमा उल्लेख गरिएको छ । टेलिकमको नेटवर्क सुधार गरि टावर नभएका ठाउँमा टावरको समेत व्यवस्थपान गरिदिन आग्रह गरिएको गाउँपालिका अध्यक्ष कुँवरले बताए ।
सुर्नयाका विभिन्न ठाउँमा टेलिकमको नेटवर्कले काम नगर्दा समस्या भएको बिषयमा यसअघि नेपाल टेलिकमको केन्द्रीय कार्यालयलाई समेत आग्रह गरिएको अध्यक्ष कुँवरले बताए ।
सुर्नयासहित बैतडीका विभिन्न स्थानमा नेपाल टेलिकमले आफ्नो क्षमता विस्तारका लागि काम गरिरहेको र यो समस्या समाधान हुने टेलिकम बैतडीका प्रमुख नारायणदत्त भट्टले बताए ।
टेलिकमको नेटवर्कले काम नगर्दा विद्यालय, वडा कार्यालय र अन्य सरकारी कार्यालयहरुलाई इन्टरनेटमार्फत गर्ने कामहरु प्रभावित भएको जनाएका छन् । यस्तै नेटवर्कले काम नगर्दा सञ्चार सुविधाबाट टाढा रहनुपरेको स्थानीयबासीहरुको गुनासो रही आएको छ ।
