बैतडी - बैतडीमा मोटरसाइकल एक आपसमा ठोकिएर दुर्घटना हुदा पाँच जना घाइते भएका छन् ।

शुक्रबार दिउँसो साडे १ बजे भएको दुर्घटनामा परी बिपरित दिशाबाट आइरहेका मोटरसाइकल ठोकिदा चालकसहित पाँच जना घाइते भएका जिल्ला प्रहरी कार्यालय बैतडीले जनाएको छ । थप घाइते हुनेमा पुर्चाैडीबाट ढोल्यामोड तर्फ आइरहेको मोटरसाकइकलको पछाडी सवार पुर्चाैडी नगरपालिका–५ हिक्मत कुवँर, श्रीभावरदेखि पुर्चाैडीतर्फ गइरहेको मोटरसाइकलमा सवार सिगास गाउँपालिका–९का ३४ वर्षीय जय बहादुर चन्द र सोही मोटरसाइकलमा सवार सिगास गाउँपालिका– ९ का २६ वर्षीय केशव बहादुर चन्द रहेको जिल्ला प्रहरी कार्यालय बैतडीका प्रबक्ता प्रहरी निरीक्षक सुरज सिंहले बताए ।

जिल्लाको श्रीभावरदेखि पुर्चौडीतर्फ जादै गरेको पुर्चाैडी नगरपालिका–५ का २४ वर्षीय अमिर कठायतले चलाएको सुदूरपश्चिम प्रदेश ०१ ०१३ प ४२४६ नम्बरको मोटरसाइकल र पुर्चाैडीबाट ढोल्यामोडतर्फ आउदै गरेको सुर्नया गाउँपालिका–८ का ३४ वर्षीय जनक लुहारले चलाएको से ५ प ४७१७ को मोटरसाइकल ढोल्यामोड पुर्चाैडी सडकखण्ड अन्तरगत पर्ने सुर्नया गाउँपालिका–८ ढोल्यामोडमा एक आपसमा ठोक्किएर दुर्घटना भएको प्रहरी निरीक्षक सिंहले बताए  ।

गम्भिर घाइते भएका मोटरसाइकल चालक जनक लुहारलाई प्राथमिक स्वास्थ्य केन्द्र देउलेकमा पठाइएको छ । यसैगरी अर्का मोटरसाइकल चालक अमिर कठायत र पछाडी सवार हिक्मत कुवँरलाई डडेल्धुरा अस्पताल रेफर गरिएको प्रहरी निरीक्षक सिंहले बताएका छन ।अन्यको स्थानीय स्वास्थ्य संस्थामा उपचार भइरहेको छ ।