बैतडी –आज सुदूरपश्चिमसहित चारओटा प्रदेशका विभिन्न जिल्लामा तीव्र गतिको हावाहुरी चल्ने सम्भवना रहेको मौसम विज्ञान विभागले जनाएको छ ।
सुदूरपश्चिमसहित कोशी, मधेश र लुम्बिनी प्रदेशका विभिन्न जिल्लामा तीव्र गतिको हावाहुरी चल्ने अनुमाग गरिएको हो ।
सुदूरपश्चिम प्रदेशका डडेल्धुरा र डोटीसहित आसपासका जिल्लामा तीव्र गतिको हावाहुरी चल्ने मौसम विज्ञान विभागले जनाएको छ । तीव्र गतिको हावाहुरी चल्ने सम्भवना रहेकाले सतर्कता अपनाउन स्थानीय प्रशासनहरुले आग्रह गरेका छन् ।
मौसम विज्ञान विभागका अनुसार कोशी प्रदेशको मोरङसहित आसपासका जिल्ला, मधेश प्रदेशका धनुषा र बारासहित आसपासका जिल्ला, लुम्बिनी प्रदेशको बर्दिया, बाँके, दाङ र अर्घाखाँचीसहित आसपासका तीव्र गतिको हावाहुरी चल्ने अनुमान गरिएको छ ।
हावाहुरी आज बेलुका पौने ६ बजेदेखि हुरी चल्न शुरु हुने र भोलि बिहीबार बिहान पौने ७ बजेसम्म रहने अनुमान छ । यसैबीच राष्ट्रिय विपद् जोखिम न्यूनीकरण तथा व्यवस्थापन प्राधिकरणले आज हावाहुरी चल्ने सम्भावना भएका क्षेत्रमा आवश्यक सतर्कता अपनाउन आग्रह गरेको छ ।
तीव्र हावाहुरीका कारण रुख तथा कमजोर संरचना ढल्ने, छाना उड्ने, विद्युत् तथा सञ्चार सेवा प्रभावित हुनेलगायतका जोखिम हुन्छ । प्राधिकरणले तोकिएका ठाउँ र समय अवधिमा सावधानी अपनाउन अनुरोध गरेको हो । हावाहुरी चलेको बेला घरबाहिर हिँडडुल नगर्ने, घरको झ्याल ढोका राम्रोसँग बन्द गर्न प्राधिकरणको सुझाव छ ।
यस्तै, जस्तालगायतबाट बनेको छानो कमजोर छ भने बन्धन बलियो बनाउन पनि भनिएको छ । घरबाहिर आगो नबाल्न, घरभित्र पनि आगो बाल्दा सावधानी अपनाउन, लड्न सक्ने कमजोर संरचना, अग्ला रुख, खम्बा नजिक र बिजुलीको तारमुनि नबस्ने र बिजुलीको तार लत्रिएको छ भने नछुन आग्रह गरिएको छ ।
उडाएर आएको सामानबाट चोट लाग्ने जोखिम हुने भएकाले चनाखो रहन तथा मौसम विज्ञान विभागबाट बेलाबेलामा आउने मौसमसम्बन्धी पूर्वानुमान र प्राधिकरणबाट जारी हुने सूचना नियमित रूपमा जानकारीमा राखी आवश्यक सतर्कता अपनाउन भनिएको छ ।
