बैतडी–बैतडीको पाटन नगरपालिकाले नगर क्षेत्रभित्र सरकारी तथा सार्वजनिक जग्गामा गरिएको अतिक्रमण तुरुन्त हटाउन आग्रह गरेको छ ।
नगरपालिकाले सोमबार एक सूचना जारी गर्दै नगर क्षेत्रभित्र सरकारी तथा सार्वजनिक जग्गा अतिक्रमण गरिएको जानकारीमा आएकाले त्यस्तो अतिक्रमण १५ दिनभित्र हटाउन आग्रह गरेको हो ।
संघीय सरकार, जिल्ला प्रशासन कार्यालयको परिपत्र र नगर कार्यपालिकाको निर्णय अनुसार अतिक्रमित क्षेत्र खाली गर्न सूचनामार्फत आग्रह गरिएको पाटन नगरपालिकाका प्रमुख प्रशासकीय अधिकृत टेकराज अर्यालले बताए ।
नगर क्षेत्र भित्रको सार्वजनिक जग्गामा बसोबास गरिरहेका, घर टहरा बनाएका, व्यापार व्यवसाय गरिरहेकाहरुले जग्गामा बसेको केही सरकारी प्रमाण भएमा सक्कलै प्रमाण बुझाउन आग्रह गरिएको छ ।
नगर क्षेत्रभित्रको सरकारी तथा सार्वजनिक जग्गामा कानुन विपरीत संरचना निर्माण गरिएको भए त्यस्ता संरचनाहरु हटाइने नगरपालिकाले जनाएको छ ।
