Sagun Khabar
बैतडीका ९ सय ७२ जना उम्मेदवारलाई कारवाही, डेढ लाख देखि साढे चार लाख सम्म जरीवना 

बैतडी –समयमै निर्वाचन खर्च नबुझाउने बैतडीका ९ सय ७२ जना उम्मेदवार कारवाहीमा परेका छन् । गएको स्थानीय तहको निर्वाचनमा विभिन्न पदमा उम्मेदवारी दिएका ९ सय ७२ जना कारवाहीमा परेका निर्वाचन आयोगले जनाएको छ । 

निर्वाचन परिणाम घोषणा भएको ३० दिन भित्र निर्वाचन खर्च नबुझाउने उम्मेदवारहरुलाई जरीवाना गरिएको हो । बैतडीमा नगरपालिकाका प्रमुख तथा उपप्रमुखका १० जना उम्मेदवार कारवाहीमा परेका छन् । उनीहरुलाई प्रतिव्यक्ति ४ लाख ५० हजारका दरले जरीवाना तोकिएको छ । 

यस्तै गाउँपालिकाका अध्यक्ष तथा उपाध्यक्षका २७ जना उम्मेदवार कारवाहीमा परेका छन् । उनीहरुलाई प्रतिव्यक्ति तीन लाख ५० हजारका दरले जरीवाना तोकिएको छ । 

यस्तै नगरपालिकाका वडा अध्यक्ष, दलित महिला सदस्य , महिला सदस्य र सदस्यका ४ सय ४६ जना उम्मेदवार कारवाहीमा परेका छन् । उनीहरुलाई जनही दुई लाखका दरले जरीवाना तोकिएको छ । 

यस्तै गाउँपालिकाका वडा अध्यक्ष, दलित महिला सदस्य, महिला सदस्य र सदस्य पदका ४सय ८९ जना उम्मेदवार कारवाहीमा परेका छन् । उनीहरुलाई जनही १ लाख ५० हजारका दरले जरीवाना तोकिएको छ । निर्वाचन खर्च नबुझाउनेमा अधिकांश पराजित उम्मेदवार रहेका छन् । 

गएको स्थानीय तहको निर्वाचनमा बैतडीमा १ हजार ४७६ जना उम्मेदवार रहेका थिए । तोकिएको जरीवाना नतिर्नेलाई आगामी ६ बर्ष सम्म कुनै पनि निर्वाचनमा भाग लिन नपाउने व्यवस्था गरिएको निर्वाचन आयोगले जनाएको छ । 

३० दिनभित्र खर्च विवरण नबुझाएका उम्मेदवारहरुलाई निर्वाचन आयोग ऐन २०७३ को दफा २५, स्थानीय तह निर्वाचन ऐन २०७३ को दफा ६४ को उपदफा ४ र स्थानीय तह निर्वाचन नियमावली २०७३ को नियम ४० अनुसार कारवाही गरिएको आयोगले जनाएको छ ।  
 

प्रकाशित मिति: मंगलबार, असोज ४, २०७९  १३:००
प्रतिक्रिया दिनुहोस्